గుడివాడలో కవిరాజు 'త్రిపురనేని రామస్వామి ' 125 వ జయంతి ఉత్సవం ఏర్పాట్లు

గుడివాడలో కవిరాజు 'త్రిపురనేని రామస్వామి ' 125 వ జయంతి ఉత్సవం  ఏర్పాట్లు  

                 ఈనెల 6 వతేదిన- గుడివాడ ఆఫీసర్స్ క్లబ్ లో - కవిరాజు 'త్రిపురనేని రామస్వామి ' 125 వ జయంతి ఉత్సవం  కేంద్ర సాహిత్య అకాడమి ,న్యూ ఢిల్లీ యొక్క దక్షిణ ప్రాంత విభాగం,బెంగుళూరు వారి ఆధ్వర్యం లో   జరపాలని నిర్ణయించడం పట్ల ఇక్కడి సాహితీ మిత్రులు సంతోష పడుతున్నారు. అక్కినేని నాగేశ్వరరావు కళాశాల పూర్వ ప్రిన్సిపాల్ శ్రీ యెర్నేని వెంకటేశ్వర రావు పర్య వేక్షణలో టాటా రమేష్ బాబు,పావులూరి శ్రీనివాసరావు ,సత్యన్నారాయణ బాబు ,సోమసున్దరరావు లుఏర్పాట్లను చూస్తున్నారు. 

                ముందుగ సాహిత్య అకాడెమీ ప్రచురించి పంపిన కరపత్రం ఆవిష్కరించడం జరిగింది. 6 వ తేది  ఉదయం 10.30 కు ప్రారంభ సమావేశం జరుగే సభలోరచయిత కేతు విశ్వనాధ రెడ్డి ప్రస్తావనతో ప్రారంభమై , త్రిపురనేని హనుమాన్ చౌదరి ప్రారంభోపన్యాసం వుంటుంది 

                11.30 కి మొదటి సమావేశం లో పసల భీమన్న 'సూత పురాణం' ,  బీరం సుందర రావు 'భగవత్గీత' కే.యెన్ . మల్లీశ్వరి 'శంభుక వధ ' ,అమ్మంగి వేణుగోపాల ' కుప్పు స్వామి శతకం ', అనే కవిరాజు కృతులు పై ప్రసంగిస్తారు.
మ. 2.30 కి ద్వానా శాస్త్రి ,'ఖూని', శశిశ్రీ 'సూతాశ్రమ గీతాలు' , సోమసుందర రావు 'కురుక్షేత్ర నాటకం' , పాపినేని శివశంకర్,'శక పురుషుడు', గుమ్మ వీరన్న ' సంఘ సంస్కరణ ' , వెలగ వెంకటప్పయ్య,'కవిరాజు ప్రభావం' అనే అంశాలపై ప్రసం గిస్తారు.
సా. 4.30 కి జరిగే సమాపన సమావేశం లో , రావేల సాంబశివరావు అధక్షతన ,మంగళగిరి ఆదిత్య ప్రసాద్ , 'సమపనోప న్యాసాన్ని ఇస్తారు. గౌరవ అతిధిగా కవిరాజు మనవడు,త్రిపురనేని సాయిచంద్ పాల్గొంటారు.
         ఈ సభకు వచ్చిన వారందరికి ఉదయం అల్పాహారం, మ. భోజనం , సా. టి , అల్పాహారం వుంటాయి.

                                                                  కరపత్రం ఆవిష్కరణ

                 చలువ మందిరం లో జరిగే ఈ సమావేశం లో పాల్గొని' కవిరాజు ' ని మననం చేసుకొందాం రండి.

     

                                                                  బ్యానర్ ఆవిష్కరణ

                                  ఇలాంటివి 15 తాయారు చేయించాము . వీటిని పురవీధులలో ప్రదర్శించి ,                                అనంతరం స్థానిక విద్యా సంస్థలకు బహుకరిమ్చాలనే ఆలోచన నాది .

కళా సాహిత్య సంస్కృతిక జీవి

ఈ రోజు ,'కళా సాహిత్య సంస్కృతిక జీవి' గా ఆంధ్ర భూమి దిన పత్రిక -కృష్ణ జిల్లా 'మెరుపు' శీర్షిక లో ,' కవులు ..రచయితలు...-36 'నందు నన్ను పరిచయం చేసారు,  శ్రీ విహారి గారు . 

ఆ పేపర్ ఇక్కడ ఇస్తున్నాను . 

            ఇందులో  " అక్టోబర్ 2001  లో రమేష్ బాబు ఒక గొప్ప చారిత్రాత్మక సాహిత్య విజయాన్ని సాధించారు. తన సంపాదకత్వం లో 'జ్ఞాపిక ' పేరు తో 'తర తరాల గుడివాడ ప్రాంత శతకవితలు ' గ్రంధాన్ని ప్రచురించారు. దీనిలో మాదయ్య కవి నుండి రేపటి కవుల వరకు రాసిన రచనలను పొందు పరిచారు. కష్ట సాధ్య మయిన కార్యం ఇది. సాహితీ లోకమంతా అభినందించ వలసిన ప్రచురణ ఇది. " అని రాసారు విహారి గారు. . ఆ పుస్తకం కోసం నేను పడిన శ్రమ మరచి పోయేలా చేసిన పై వాక్యాలు , నాకు ఆనందాన్ని కలిగించాయి. .

     శ్రీ విహారి గారికి ధన్యవాదాలు. 

"ఎదురీత" సీరియల్ లో "వెంకట్రావు" గా నేను!

"ఎదురీత" సీరియల్ లో నేను

     గత కొంత కాలంగా 'మా టివి ' లోప్రతి రోజు రాత్రి 8 .30  కి   వస్తున్న"ఎదురీత "సీరియల్ లో "వెంకట్రావు" గా నటించే అవకాశం దొరికింది. ఇంతకు ముందు 'సంసారం సాగరం ', 'లయ ' సీరియల్ లలో  గాని, 'అబ్బాయి ప్రేమలో పడ్డాడు' చలన చిత్రం లో గాని  నటించే  చాన్స్ దొరికింది అంటే  కేవలం  రచయిత  పి. చంద్ర శేఖర ఆజాద్ నా ప్రాణ మిత్రుడు కావటమే! ఇంకా దూరదర్శన్ లో అనేక కార్యక్రమాలు చేయడానికి  తనే కారణం.. ముఖ్యంగా 'పప్పెట్ షో ' చేయించటమే కాక,  అందులో తన గొంతు కూడా ఇచ్చాడు. ఇంకా 'మా పసల పూడి కధలు' సీరియల్ లో  కొన్ని భాగాలకు ఆజాద్ వద్ద   'మాటల సహకారం' అందించాను.
         గత పది రోజులుగా 'ఎదురీత' సీరియల్ లో వెంకట్రావు గా షూటింగ్ లో పాల్గొన్నా. హైదరాబాద్ లో జరిగింది. ఈ సీరియల్ కి నటుడు, ఇంటూరి వాసు దర్శకత్వం వహించారు. స్క్రీన్ ప్లే ,మాటలు పి.చంద్ర శేఖర ఆజాద్ అందిస్తున్నారు. 
         జీవితం లోని భిన్న కోణాలను ఆవిష్కరిస్తూ , నడుస్తున్న ఈ సీరియల్ లో విధి వశాత్తూ బతికి చెడిన కుటుంబం ఒక మెస్ ఓపెన్ చేస్తారు. అందులో సహాయకుడు గా 'శాస్త్రి' అనే అతను -వెంకట్రావు ని చేరుస్తాడు. 
తనకంటూ ఎవరు లేకపోయినా , తన చుట్టూ వున్నా వాళ్ళే తన వాళ్ళు గా భావించే మనసు వెంకట్రావుది . చాల మంచి పాత్ర ఇది. కథానాయకుడు, కథానాయకురాలు కుటుంబాలకు చేతనైన సహాయం అందిస్తూ ...ఫిలసాఫికల్ గా , మనుషులలో వుండే చిత్రమైన మనస్త త్వాన్నిఆవిష్కరిస్తూ పలికిన సంభాషణలు తో సాగుతుంది.  
      ఆ తరవాత కథ ను బుల్లి తెర పై  వీక్షించండి. నా పాత్ర మరియు ఈ సీరియల్ మీద మీ అభిప్రాయాలూ చెప్పండి. ఈ నెల 20 తేది నుండి నా పాత్ర, అదే 'వెంకట్రావు' ప్రవేశించాడు. మీరు కూడా మీ కుటుంబం లో వ్యక్తిగా ఆదరిస్తారు కదూ.
        షూటింగ్ లో కొన్ని ఛాయాచిత్రాలు ఇక్కడ పెడుతున్నాను.

             వెంకట్రావు పాత్ర స్వభావాన్ని వివరిస్తున్న  దర్శకులు ఇంటూరి వాసు, రచయిత పి. చంద్ర శేఖర ఆజాద్, కెమరా- రామకృష్ణ , సహాయకులు . ఎడమనుండి మొదటగా నేను. 

                  'నైవేద్యం' మెస్ లో పనివాడుగా చేరుతున్న సందర్భం. ఎడమనుండి నేను, వాజ్ పాయి , సత్య కుటుంబం 

                        ఈ సీరియల్ లో  నేను పని చేసే 'మెస్' ఇదే!  పేరు                                              'నైవేద్యం'
                             అమ్మ చేతి వంటని  ఆరగించండి

            మెస్ లో మొదట భోజనం చేస్తున్న వాజ్ పాయి గారికి వడ్డిస్తూ ,పనిలోకి ప్రవేశం 

                                       కళకళ లాడుతున్న' మెస్'
  

                     'మెస్' లోకి వస్తుండగా కెమరామెన్ రామకృష్ణ తో

              అయ్యో , ఇదేమిటి ? అక్కా చెల్లెళ్ళు స్మశానం దగ్గర ! వారితో పాటు నేను కూడా... ఏమి జరిగింది? ఎవరు మరణించారు? ...రాబోయే కాలం లో చూద్దాం....

              భాస్కర్ కి నాతో పనేమిటి? హీరో తో నాకు మాటలా ? ఏదో చెప్పు కుంటున్నాడు నాతో.. ఏమిటది?  
             -  ఒక సీన్ లో సూచనలు ఇస్తున్న దర్శకులు వాసు, సహా దర్శకులు పొట్లూరి రాంబాబు 

                    సహదర్శకులు రాంబాబు, నేను , నా వెనుక 'బుచ్చి'

 

 మేకా  రామకృష్ణ , నేను 

       షూటింగ్ లో పాల్గొంటున్న నాకోసం - ఆ ప్రదేశానికి వచ్చి , 'ఎదురీత' సంభాషణలు రాస్తున్న పి. చంద్ర శేఖర ఆజాద్. 
       ప్రస్తుతానికి ఇంతే! తరవాత షెడ్యుల్ లో మరి కొన్ని ఫోటోలు 

        అన్నట్లు " లయ" సీరియల్ లో కూడా నా పాత్ర 'వెంకట్రావే'! పెళ్లి కానీ వెంకట్రావు . చివరికి పెళ్లి అవుతుంది అనుకోండి.అదంతా... 'లయ'  కథ . 

నందన నామ సంవత్సర ఉగాది వేడుకల లో పాల్గొని 'నా గొడవ' ని కవిత గానం చేశాను . ఆంధ్ర ప్రదేశ్ సంస్కృతిక శాఖ, కృష్ణ జిల్లా సంస్కృతిక మండలి సంయుక్త ఆధ్వర్యం లో , మచిలీ పట్నం ,టౌన్ హాల్ లో జరిగిన ఈ కవిసమ్మేళన అనంతరం అదనపు జిల్లా  కలెక్టర్ రమేష్ కుమార్ గారు నన్ను సత్కరించారు.

మా నాన్నగారు

మా నాన్నగారు 

ప్రసిద్ధ బౌద్ధ క్షేత్రం గా చరిత్ర పుటల కెక్కిన వూరు అది.
గుంటూరు జిల్లా లో వున్న ఆ వూరు  పేరు 'భట్టిప్రోలు'. 
ఆ ఊర్లో ' వెంకటేశ్వర్లు'  అనే  రైతు ఇంట సెప్టెంబర్ 6 న 1929 సం.లో జన్మించారు శ్రీ తాతా బసవలింగం. అం.ప్ర.ప్రభుత్వ విద్యా శాఖ, కృష్ణా జిల్లాలో తన ఉద్యోగ జీవితాన్ని గడపి విశ్రాంతి పొంది మరల 'భట్టిప్రోలు' చేరుకొన్నారు. అనేక ఆరోగ్య సమస్యల మధ్య , వారి కోరిక మీద కుమారుడయిన నా దగ్గరకు వచ్చి వైద్యం చేయించు కొన్నారు. అలాగే ది.30 .11 .2011 న కూడా నా దగ్గరకు వచ్చారు. వారితో పాటు వారి శ్రీమతి అయిన మా అమ్మగారు 'లక్ష్మి నరసమ్మ' కూడా ఎప్పుడూ వుండి,వారిని కంటికి రెప్పలా చూస్తున్నారు. మా అమ్మగారు ఎప్పుడు జన్మించారో తెలియదు. అయితే మా నాన్న గారి కంటే 9 సం. చిన్న అని చెప్తారు.వారి కుటుంబంలో అందరు నిరక్ష రాస్యులే!
             మా అమ్మ నాన్నలతో నూతన  2012 సం. వేడుకలను నిర్వహించారు, మా పిల్లలు.

    

2012 కేక్  కట్ చేస్తున్న 'బసవలింగం',లక్ష్మి నరసమ్మ 

            ఆనందంగా నూతన సంవత్సర శుభకామనలు తెలుపు కొంటున్న దంపతులు 
             ఇలా నూతన సంవత్సర వేడుకలు జరుపుకోవటం వీరికి జీవితం లో  ఇదే మొదటిసారి కావటం విశేషం . అందువల్లనే ఈ విషయాన్ని  మీతో పంచుకొంటున్నాను 

          

వ్యర్థానికో అర్థం

వ్యర్థానికో అర్థం 

              ప్రత్యేక సందర్భాల్లో ఆత్మీయులకు శుభాకాంక్షలు తెలపటం మన సంస్కృతి . మూడు రోజుల్లో రాబోయే నూతన సంవత్సరానికి వినూత్నంగా  శుభాకాంక్షలు తెలపటానికి ప్రయత్నం చేద్దాం. ముఖ్యంగా వ్యర్థంగా పారవేసే వాటితో అందంగా గ్రీటింగ్స్ తయారుచేస్తే..... పైసా ఖర్చు లేకుండా ..... మనకు తృప్తి  .. అందుకున్నవారికి సంతృప్తి  కదా!

              మరీ ముఖ్యంగా ఆ కార్డులను తయారు చేయటానికి ఉపయోగించే నూతనత్వం , తీసుకున్న వారు పొందే ఆనందం -వెరసి ఇరువురి మధ్య 'అనుబంధం ' పదిలమవుతుంది కదా!

               ఉదాహరణకి 

               సాధారణంగా  పెన్సిల్ చెక్కిన తరువాత ఆ చెక్కుడును పారవేస్తాం . కానీ ఆ వ్యర్థం తో అందమైన గ్రీటింగ్ తయారు చేస్తే ,పై విధంగా వుంటుంది.

                ఇలా చేయటానికి చిత్రకరులే కానవసరం లేదు కుడా . నీటి రంగులు తీసుకుని  ఒక్కో రంగు మీద చూపుడు వేలు తో అద్ది .... ఆ రంగును పువ్వు ఆకారం లో అద్దితే  . అందమైన చిత్రం .

                రకరకాల రంగుల ముఖమల్ పేపర్  ముక్కలను ఒక పద్దతిలో పేర్చితే మరో బొమ్మ 

                 కత్తిరించి పారవేసే ఎలాంటి కాగితాలను అయినా ,ఒకే రంగు కాగితాన్ని ఆయినా ....పారవేసే  నోట్స్ అట్ట పైన  అంటిస్తే ........

                వార్త పత్రికలలో ముద్రించిన 'పువ్వు' బొమ్మను కత్తిరించి ,ఒక  కాగితం మీద పెట్టి ఆ బొమ్మ అంచుల మీద పెన్సిల్ తో రుద్ది ,చూపుడు వేలితో కాగితం మీదకు రాసి , కత్తిరించిన పువ్వు బొమ్మను తెసివేస్తే  మరో సృజన.

                 మనం నిత్యం పారవేసే రకరకాల అట్టలను కత్తిరించి అంటిస్తే . ఆ తరవాత స్కెచ్  పెన్తో  తీర్చి దిద్దితే !ఒక నవ్వుల బొమ్మ .

                 వ్యర్థ కాగితాన్ని తీసుకొని రంగులు చల్లి , మధ్యకు మడతవేసి తీస్తే, చిత్ర విచిత్రమైన ఆకారాలు పరచు కొంటాయి . వాటిని సీతాకోక చిలుక లాంటి ఆకారాలలో కత్తిరించి ,వివిధ కొలతలతో పేరిస్తే .....

                 ఇలా ఎన్నయినా చేయవచ్చు. మనలో ఉన్న సృజనాత్మకతను వెలికి తీసి  అబ్బుర  పడనువచ్చు.ఆత్మీయులను ఆనందంలో ముంచవచ్చు.

                 నవ్యతతో నూతన సంవత్సర శుభాకాంక్షలు అందించటానికి కాస్త తీరిక చేసుకొందమా !   

 

త్రిపురనేని మహారధి జ్ఞాపకాలు నా కవిత్వ నేపధ్యం లో

2007 సం.లో విజయవాడ లో జరిగిన ప్రపంచ తెలుగు రచయితల మహాసభల నిర్వాహకులలో ఒకడిగాఎంతో మంది లబ్ధ ప్రతిష్టులతో మాట్లాడటం , మరెంతో మంది నిర్వాహకుడిగా, కవిగా గుర్తించటం జరిగింది. అక్కడే 'మహారధి' గారితో వ్యక్తిగతంగా నాకు పరిచయ మయినది. నాది గుడివాడ అనగానే దగ్గరకు తీసుకుని హత్తుకున్నారు . ఆ తరవాత అప్పుడప్పుడు ఫోనులో మాట్లాడుకునే వాళ్ళం . నేను రాసిన 'నా దేశం ' దీర్ఘ కవిత పంపాను. అది చదివీ బహుళ ఆశీస్సులు ఇస్తూ, ద్వితీయ భాగాన్ని రాయమని ,అందుకు అవసరమయిన స్ఫూర్తి కొరకు ధ్యానం చేయమని రాసారు. ఆ వ్రాత ప్రతిని పంపితే తానే ముందుమాట రాస్తానని కూడా రాసారు. ఇంతలోనే ఆయన మృతి చెందటం నాకుతీరని లోటు.
'నా దేశం ' దీర్ఘ కవితలో 'త్రిపురనేని మహారధి' గారు స్పందించిన తీరు చదవండి.

'నీరసంగా గుంపులు గుంపులు గా
నుదుట పట్టిన చెమట బిందువులో
సూర్యుడు '
మహారధి : గొప్ప భావం , శ్రమశక్తి కి పట్టాభి షేకం
'రా మిత్రమా,
కరిగిపోయిన జ్ఞాపకాలను త్రవ్వు కుంటూ
శ్రమించిన
ఆ స్పర్శలో ఊరడింపును వెతుక్కుందాం
రా నేస్తమా
ఒకానొక అణచరాని సామాజిక కసిలో
విరిగిపోయిన అవయవాలను అతికించుకుంటూ
ధైర్యాన్నిచ్చిన
జీవితానికి కృతజ్ఞత చెప్పుకుందాం
రా దోస్త్
ఒకానొక రస్తాపై రేగిన అలజడిలో
సమకాలీనతను సాధించుకుంటూ
చైతన్యాన్ని
భవిష్యత్తుకు బహుమతిగా ఇద్దాం
రా కామ్రేడ్
ఒకానొక కొలిమిలో మండిన ఇనుములా
దగ్ధమై
ఆయుధంగా మారిపోయే
ఉద్యమాన్ని ఆహ్వానిద్దాం'
మహారధి : ఓహో ! ఇక్కడ ఆరంభ మైంది మహత్తర ఆశావహ దృక్పధం . ఇది విప్లవాగ్ని
'బడిని చూస్తే
ఆటపాటల అందాల తోటలై
నవ్వుల కేరింతల రంగుల హరివిల్లులై
విజ్ఞాన వికాసాల అంతరిక్షం లో విహరిస్తూ
చెంగున దూకే బాల్యం ల ఉంటుందనుకున్నా
.............................................................
ఇప్పుడు
బడిని చూస్తుంటే
మోయలేని భారాన్ని భుజాలకెత్తుకొని
నడుము వంగి శక్తులుడిగిన
వెట్టి చాకిరీల వృద్ధాప్యం ల ఉంది '
మహారధి : కళలు కనే కాలం యోధుడా ! నీ కలల బరువుని కాలమే మోస్తున్నది.
' ఒక ధాన్యపు గింజను విత్తి
వంద గింజలను పండించటమే
ప్రతి సృష్టి
ఒక నిజాన్ని ఎలుగెత్తి
వంద నిజాలను నినదించటమే
పోరాటం '
మహారధి : శెభాష్ ! ప్రకృతి సత్యాన్ని ఆవిష్కరించావ్ : అద్భుతం -
'ఈ అక్షరాన్ని మీటినా
చెదిరిన జీవన గమ్యమై
ఒక దుఖ్ఖాన్ని ఆలపిస్తుంది'
మహారధి : అందని ఆకాశాన్నే కాదు అడుగు లేని పాతాళాన్ని కూడా దర్శించావ్
'మౌన పోరాటాలతో తడారిన మనసు
చెరిగిన విశ్వాసమై పగుళ్ళిస్తుంది
నువ్విదే సరైన దారనుకుని
వెర్రిగా ఓడిపోవటానికి అలవాటు పడతావు '
మహారధి : బలహీన వర్గాల బలహీనపు ఆలోచనలకు అద్దం
"పగుళ్ళని పద్యాలతో అతికిస్తు "
మహారధి : ఆఖరి శ్వాస వరకూ ఇలాగే అతికించు
'బాబూ నాయనా.....
నువ్వూ మనిషి వేగా
అమ్మానాన్నలకు పుట్టినోడివేగా
తల్లి పాలను తాగి ఎదిగిన నీ నాలుకను
రెండుగా చీల్చి విష నర్తనం చేయిస్తావేం
బాల్యంలో లేని కాఠిన్యాన్ని
మొఖానికి వికృతంగా పులుము కుంటావేం ?
ఈ నీచానికయినా దిగజారే మృగత్వాన్ని
శరీరానికి ప్లాస్టిక్ సర్జరీ చేయిస్తావేం'
మహారధి : అబ్బ! ఎంత కసి ! ఇదే కావాలి కవికి
'రాత్రంతా బీటు వేసిన వెన్నెల నేత్రాలు
చింత నిప్పులై ఉదయాన మొలుచు కొచ్చినప్పుడు
ఒక దుఖాన్ని దిగమింగుకొని
పెదాలపై పలవరించే భవిష్యత్ స్వప్నాలను
నిజం చేసుకో '
మహారధి : శ్రీ శ్రీ గడపిన నిద్ర లేని రాత్రులా ?
'నిజం దర్శించలేని ఇజం
నీలో లేకపోతే
కోపం సంతోషం బాధ
స్పందన ప్రదర్శించలేనితనం
నీలో ఇంకి పోతే
మళ్లీ
తల్లి గర్భం లోకి ప్రయాణించు
తొమ్మిది మసాల చైతన్యాన్ని
తనివి తీరా అనుభవించు '
మహారధి : వాహ్ ! నవ్యత్వానికి నాంది . ఎంత హుందాగా ఉండాలో గొప్పగా చెప్పావ్ !


'